حسن بيقول يا رب

يا رب يا كريم

يا رب أرضع لغاية ما أشبع
يا رب لما أرضع ما ارجعش
يا رب ما يجينيش إسهال
ولا إمساك
يا رب ماما تسمعني أول ما أعيط
يا رب ماما تحس إني عملت بي بي بسرعة
علشان البامبرز بيضايقني
يا رب البامبرز ما يضغطش على بطني
يا رب ما استحماش كل يوم علشان الدنيا برد
يا رب ماما ما تلبسنيش بافتة علشان بتخنقني

(ابتهالات خاصة )

أنا واللمبة

مش عارف ليه باحب أبص في اللمبة وأركز جامد

لما بابص عليها بانسى الدنيا وما فيها

فيها حاجة بتشدني

ويا سلام بقى لما الدنيا تكون ضلمة وفجأة ماما أو بابا يفتحوا النور

ساعتها باحس بأمان وباحس أني محتاج أركز في اللمبة حبيبتي

أنا باحب اللمبة جدا وعشان كدة قررت أني أطلع وأبص عليها من قريب

وأشوف بتشتغل ازاي

وكمان علشان أحس أني قريب منها

أبو علي واللمبات الثلاثة

أنا وحبيبتي

حزين حزين حزين

الحقيقة أنا حزين حزين حزين ..

امبارح فتحت الإيميل بتاعي لقيت رسايل كتير

للأسف كل الناس بيقولوا اني مش أنا اللي باكتب في المدونة بتاعتي

وناس كتير بيقولوا أن ماما أو بابا هما اللي بكتبوا لي

ومفيش حد مصدق اني أنا فعلا اللي باكتب في المدونة

وعموما أنا جبت الصورة اللي هتكذب كل الحاجات اللي بتتقال عني

ومش هتخللي أي حد يشك إني أنا اللي باكتب في المدونة دي

بافتح الإيميل

بامارس هوايتي في التدوين

bed alone

أنا الحمد لله شبعان ..
ومش مبلول لأن لسة ماما مغيرة لي البامبرز ..
وحاسس بالدفا ومتكلفت في 3 بطاطين ..
ومش عندي مغص ولا فيه حاجة بتتعبني ..
طيب المشكلة فين بأة .. ؟!
انا ليه باعيط كدة ومش عايز أسكت ؟
فضلت أفكر في موضوع العياط ده كتير
لغاية ما اكتشفت السبب
أنا باعيط لما أحس اني لوحدي
أصل إحساس الوحدة ده بشع
وبيخوفني ..
أنا باحس بالوحدة لما ماما تكون في المطبخ
أو لما يكون معاها حد وسايباني لوحدي
أو لما تكون بتشتغل على الكومبيوتر
أنا باحاول اني ما أعيطش علشان ما أضايقش ماما
بس للأسف احساسي بالوحدة بيسيطر عليا
وبيخليني أعيط غصب عني
يا ريت ماما ما تزعلش مني
ويا ريت ما تسبنيش لوحدي على السرير

lonely

أنا أبو علي الحقيقي مش كريم عبد العزيز

النهاردة وانا مأنتخ في سريري بعد الرضعة

وبافكر في حكاية الاستحمام وفي الرضعة الجاية

فوجئت بماما بتعلي التليفزيون وبتقولي بصوت عالي : يا حسونة فيلم أبو علي جه

أنا طبعا – بيني وبين نفسي – قلت فيلمي ؟!هو أنا عملت فيلم باسمي وانا مش عارف ؟!

وسألت نفسي بعد كدة : هو يعني أيه فيلم أصلا ؟!

المهم لقيت ماما منسجمة مع الفيلم ومركزة معاه جامد

فقعدت أنا أتفرج يمكن اتسلى شوية

ولقيتها فرصة علشان أشغل دماغي بحاجة تانية غير التفكير في الرضعةاللي هتاكل دماغي

والحقيقة اني لقيت الفيلم حلو أوي وممتع جدا

ومن شدة اعجابي بالفيلم تخيلت اني باشارك فيه

وتخيلت نفسي أبو علي اللي في الفيلم

وان الفيلم معمول أصلا عشاني

والصورة دي ظهرت لي في الحلم اللي حلمته بعد ما تخيلت نفسي أبو علي

أنا في النص أهو

قبل وبعد

دي صوري قبل الاستحمام وبعده

وطبعا باين الفرق في الأولى أنا مصدوم ومش فاهم أيه اللي هيجرى لي

وفي التانية مأنتخ ونايم في السرير

الصدمة

الأنتخة

الخونة

خيااااااانة .. احساس فظيع فظيع فظيع
الخيانة دي حاجة وحشة جدا ..
خصوصا لما تيجي من أقرب الناس لقلبي ..
ماما أخدتني النهاردة على خوانة ..
من الدار للنار
كنت نايم وحاسس بالدفا وباحلم بالرضعة الجاية
وحاسس بطعم اللبن الجميل في بقي
وصحيت على أمل أن ماما هترضعني ومستني على نار ..
وفجأة حصل اللي عمري ما كنت أتخيل أنه يحصل
ماما قلعتني هدومي كلها كنت هاموت من البرد
وشالتني وحطتني في المية ..
في الأول صرخت من الصدمة
لكن الحق يتقال بعد كدة لقيت نفسي مبسوط المية كانت حلوة أوي ..
لكن أكتر حاجة ضايقتني في الموضوع ده
لما الشامبو كان بييجي على عيني ..
بس تمام ..
بعد الموضوع ده ولما ماما لبستني
حسيت بانتعاش جامد وعرفت ان الحكاية دي اسمها استحمام
ماما رضعتني بعد كدة رضعة تمام
بس ده ما يمنعش اني حسيت بالغدر في الأول
الحقيقة كان لازم ماما تقولي قبلها مش تصدمني كدة

أوعي تسيبيني يا تيتة .. أنتوا هتغرقوني ولا أيه ؟

سيبي سيبي .. أنا هاعوم لوحدي

أنا مين ؟!!

بصراحة أنا اتلخبطت آخر لخبطة .. وعايز أعرف أنا مين بالظبط ؟
ماما بتناديني وبتقولي حسونة
وبابا بيقولي يا أبو علي
وفي ناس بييجوا عندنا البيت بيقولوا ان اسمي حسن
أنا مين في دول .. حسونة ولا أبو علي ولا حسن
حد يفهمني لاحسن دماغي هتضرررررب

يا ترى أنا مين فيهم؟!

يوم ورا يوم ..

النهاردة ماما قررت أنها تعمل لي مدونة على النت لاني كملت 40 يوم بالظبط
أصل أنا اتولدت يوم 24 ديسمبر 2006
ماما فضلت تعمل في المدونة دي أكتر من 5 ساعات وفي الآخر عملتها والحمدلله
بس اللي كان مضايقني أنها كانت مشغولة عني جدا ومش مركزة معايا خالص
أنا بصراحة استغربت من انشغالها ده وسألت نفسي هو مين اللي إبنها أنا ولا الكومبيوتر ؟
عموما أنا في الآخر لما عرفت أنها بتعمل كل ده علشاني انبسطت وكبرت دماغي وما زعلتش منها
المهم إني بعد كل ده في المدونة دي هاقدر اكتب يومياتي يوم ورا يوم
أنا دلوقتي مرتاح جدا لاني لو اتضايقت أو زعلت من بابا أو ماما هاقدر أدخل على النت
وأفضفض بدل ما أكتم في نفسي وأطق من الغيظ والوأوأة

online حسونة