تلات سنين

عيد ميلادي التالت..
المرة دي احتفلت بعيد ميلادي في حضانتي الجديدة
اسمها بامبل بي bumble be
عيد ميلادي المرة دي حضره كل الناس اللي باحبهم
هبة المدرسة بتاعتي اللي بتديني ألماني
وجابت لي هدية حلوة أوي
وفراو نادية اللي بتديني في الحضانة
وليديا برضه مدرسة معايا في الحضانة
وأمينة صاحبتي وكريم
وماما جت وجابت لي تورتة
وأديت هدايا لاصحابي في الكلاس
أنا مبسوط إن عندي 3 سنين
كل سنة وأنا طيب

أنا بين هبة وفراو نادية

هبة حبيبتي.. أنا باحبها أوي

أنا بادي هدية لأمينة

هبة وليديا عايزين يرفعوا الكرسي وأنا عليه

هبو وليديا بيرفعوني بالكرسي

أنا مبسوط ونا مرفوع بالكرسي كده

بيغنوا لي أغنية عيد الميلاد بالألماني

أنا وأمينة وكريم بنغني وبنصقف

أنا مبسوط أوي

التورتة عليها صورتي

وعملنا دودة عليها صورتي .. وكلنا لوناها مع بعض

ياللا ناكل التورتة بأة

يا جماعة انا جعان

كل سنة وأنا طيب

في المصيف

سافرنا أنا وبابا وماما العجمي

دي حتة كده في إسكندرية

وإسكندرية دي بأة فيها بحر كبير أوي

وفيه مية كتير أوي أكتر من البانيو كمان

أنا بقى كنت خايف موووت من المية

وماكنتش عايز أنزل

وكنت باحب أكتر ألعب في الرملة على الشط

لأني أصلا مش باعرف أعوم

وبصراحة باخاف أغرق

ما هو العمر مش بعزأة

أحلى حاجة عند البحر الرملة

طالما مفيش بحر.. أنا مبسوط


لا لا مش هانزل.. ده كبير أوي أوي

هاموت من الرعب

حتى بالعوامة مرعوب موووت

حياة بلا بامبرز

أنا خلاص كبرت

وباروح الحمام كل ما احب أعمل بي بي

مش باعمل في البامبرز زي زمان

حتى وأنا نايم مش بالبس بامبرز

لولي أختي بس هي اللي بتلبسه لسه

عشان هي لسه بيبي

إنما أنا كبرت خلاص وعرفت طريق الحمام

وداعا للبامبرز

فرحة التحرر من البامبرز

ما احلاها عيشة الحرية

حسوني بين حطام اللعب

لازم أبوظ اللعبة دي

أبوظ إيه كمان؟


لازم أبوظ اللعبة اللي في إيدي دي برضه

يا رب ماما ما تخدش بالها من اللي أنا عملته ده

كلامنجي

أنا دلوقتي طبعا باتكلم كويس أوي
باقول كلام كتير
ساعات باقوله صح وساعات باقوله غلط
المهم إني باتكلم
ودي بعض الكلمات اللي باقولها وجنبها التصحيح بتاعها
"سخمة" .. "سخنة"
"منن" .. "لبن"
"توم وزيري" .. "توم وجيري"
"عايزة ألوح باي" .. "عايز أروح باي"
"نوم لأ" .. "مش عايز أنام"
"برتكان" .. "برتقان"
"أسون" .. "ينسون"
"عبية" .. "عربية"
"زيون" .. "تليفزيون"
"ابس سلاب" .. "ألبس الشراب"
"بتل وتويتي".. "سيلفستر وتويتي"
"في نومة" .. "الفيل أبو زلومة

"داللة" .. "عبد الله

"جبة" .. "جزمة"

"ججلة" .. "شجرة"

"كاكسي" .. "تاكسي

"ووف" .. "خروف"

"ماما باي" .. "باي يا ماما

حسوني في جنينة الحيوانات

يوم التلات فوجئت وأنا في الحضانة ببابا وماما

جايين هما الاتنين ياخدوني

أنا بصراحة استغربت

لأني متعود أن واحد منهم بس هو اللي ييجي ياخدني من الحضانة

يعني يا إما بابا يا إما ماما

لكن الاتنين مع بعض دي غريبة شوية

المهم.. أنا فرحت بيهم جدا

وقلت أحسن برضه

كلنا نرّوح سوا

لكن فوجئت إن بابا وماما واخديني على حتة تانية

ولقيت نفسي داخل معاهم

في مكان واسع ومليان شجر وناس وحيوانات

وعرفت أن المكان ده اسمه جنينة الحيوانات

أنا كنت مبسوط خالص بالجنينة دي

لأني لأول مرة أشوف الحيوانات على الحقيقة

الفيل أبو زلومة ورايا على طول

القرد القرد.. مش خايف منه طبعا

مرعوب من الأسد.. أنا باخاف من الكلب يطلع لي أسد؟

يا ماما.. إلحقيني

ده بياكل لحمة وأنا قلقان منه

وآدي مرات الأسد بتاكل هي كمان

أنا بأكل الغزالة بإيدي وطبعا مش خابف منها

حسونة في عيد ميلاد تونا

أنا الفترة اللي فاتت كنت مشغول جدا جدا

عندي حضانة ورسم وتلوين ولعب

مابقيتش فاضي زي الأول

ويمكن عشان كده سبت المدونة

لأن معنديش وقت أكتب فيها

بس النهاردة قلت لازم ادخل أكتب

وأحط صوري وصور أصحابي في عيد ميلاد صاحبتي فاطمة

عيد الميلاد ده كان في شهر أغسطس

وعلى فكرة فاطمةلما بيندهوا عليها بيقولوا لها "تونا"

وهي عندها أخ اسمه يحيى

بس يحيى كبير ومش باعرف العب معاه

أنا بالعب مع تونا

رغم أنها ساعات مش بترضى تلعب معايا برضه

يمكن تكون شايفة إني لسة صغير

المهم كل سنة وانتي طيبة يا تونا

أول ما رحت لقيت نفسي قاعد لوحدي

لما زهقت بدأت العب بالبلالين

لما زهقت من البلالين قعدت اقرا الجرايد

لما زهقت خالص قلت ما بدهاش لازم اندمج مع الناس

رحت العب مع البنات المعزومين في عيد الميلاد


ولما الموسيقى اشتغلت رقصت مع الناس وكنت مندمج أوي


بارقص ومبسوط وفاطمة جنبي بترقص هي ويحيى

كله بيرقص أنا وتونا ويحيى وكل الموجودين

حسونة.. أول يوم حضانة

امبارح كان أول يوم أروح فيه الحضانة
صحيت الصبح بدري
الساعة 7 ونص
ولبست لبس جديد
وأخدت معايا شنطة عليها تويتي
ورحت الحضانة
اسمها إيديلفايز
بناخد فيها لغة غريبة اسمها ألماني
وبنغني أناشيد بالألماني
وبالعب بالبازيل
وباكل كمان
أنا مبسوط والله إني رحت الحضانة
حاسس إني بقيت كبير

عندما قرر حسونة مساعدة ماما في غسل المواعين

لازم أساعد ماما

أنا مابقتش صغير

هاقعد في الحوض

وأغسل المواعين

يا رب ماما تبأة مبسوطة مني

باغسل بتاعة اللبن بتاعتي

هازود المية السخنة عشان المواعين تنضف
بالفرشة دي هاغسل القزايز

هي المواعين مش راضية تخلص ليه؟

الاستقلال التام

أنا مش عايز حد يأكلني

أنا عايز آكل لوحدي

دلوقتي أهو باعرف امسك المعلقة وباكل..

يعني أنا مش هاعرف أكل نفسي؟

لكن ماما مش بترضى وبتقعد تزعق وتقول: حسونة لسة صغيرة.. ماما هي اللي تأكل حسونة

لأن هي بتقول إني باوسخ نفسي

وباوسخ كل حاجة

أنا كمان مش باسكت

بافضل أعيط وأصرخ

وبارفض إنها تأكلني لغاية ما تسيبني آكل لوحدي

بسم الله الرحمن الرحيم

آكل بإيدي ولا بالمعلقة

محدش هيقرب للطبق بتاعي.. أنا هاكل لوحدي

ماتحاوليش يا ماما.. مش هتأكليني.. أنا خلاص باعرف آكل

يا أبو جلابية

أنا والله الكام يوم اللي فاتوا دول كنت مكتئب خالص وزعلان
لأن ماما كانت مسافرة
بس هي لما رجعت من السفر أمبارح أنا انبسطت أوي
أولا: لأنها كانت واحشاني جدا
ثانيا: لأنها جابت لي شيكولاتة
ثالثا وده الأهم: لأنها جابت لي جلابية حلوة أوي
ودي أول مرة في حياتي ألبس جلابية
بصراحة الجلابية مريحة أوي أوي
أحسن من الشورت والبنطلون والحاجات دي
إنشاءالله ماما لما تسافر تاني تجيب لي جلبية تاني
حمدالله على السلامة يا ماما
وشكرا على الجلابية

دي جلابيتي

جامدة

مريحة
وشيك أوي

حسونة متنرفز

مش عارف ليه اليومين دول بتجيلي حالة غريبة؟!
أي حد يزعلني.. اتنرفز واتعصب
وامد بوزي لبرة
وبعد ثانية واحدة افتح في العياط
ماما بتقول إن حسونة بأة عصبي
وبابا بيقول إني باتدلع لما باعمل كده
عشان يعملوا لي اللي أنا عايزه
بس أنا والله مش باتدلع ولا باكون عصبي
أنا باكون عايزهم يعملوا لي اللي أنا عايزه
من غير ما اتعصب
ومن غير ما اتنرفز
عشان أعصابي كده ممكن تبوظ
:(مش عارف والله.. الناس دي مابقتش فاهماني

حسونة بيتغير

أنا معترض


طب هابوز أهو.. ها

أستغماية

اليومين دول باحب أوي
أستخبى
وماما وبابا يدورا عليا وميلاقونيش
وأنا أبقى سامعهم وهما بيدوروا عليا
بس مش بارد
لغاية ما هما يلاقوني
وأحسن أماكن باحب استخبى فيها
أولا : ورا الأنتريه

ثانيا : ورا السفرة

ثالثا : ورا غطا الغسالة
بس واضح إني الفترة الجاية دي هاغير الأماكن
اللي باستخبى فيها
لأن بابا وماما خلاص عرفوها
أما أشوف هاعمل إيه

باستخبى ورا الكنبة من غير بابا وماما يشوفوني

يا نهار أبيض لقوني وأنا باستخبى ورا السفرة في المطبخ

وكمان باستخبى ورا غطا الغسالة

وبابا شافني وأنا مستخبي

لما لقوني ورا الكنبة.. بعد مادوختهم.. اتخضيت

حسونة والبانيو الكبيييير

أخيرا ماما وافقت إني أستحمى وأبلبط في البانيو الكبير
أصلي أنا كنت زهقت من البانيو الصغير بتاع الأطفال
لأني كبرت ومكنتش باعرف أعوم فيه خالص
ماما بس تحميني وتطلعني في الفوطة
لكن دلوقتي بانزل البانيو الكبير بأة
وبالاقي فيه مية كتيرة
وأقعد ألعب كتير لغاية ما أزهق
أنا كان نفسي من زمان أقول لماما إن حسونة خلاص كبر
ونفسي يا ماما أستحمى في البانيو الكبير
بس ماما مش بتسمعني وبتعمل اللي في دماغها وخلاص
ياللا مش مهم.. المهم إني دلوقتي باستحمى في البانيو الكبيييييييير
هييييييييييييييييييييييييييييييييييه

البانيو واسع أوي

يا جمال المية والبانيو مليان

وبالعب كمان براحتي

لا مش هاخرج دلوقتي.. لما أشبع من المية الأول
طيب خلاص يا ماما لعبة كمان وأخرج

حسونة ضد الفساد

إمبارح.. فجأة وأنا نايم ومأنتخ
لقيت بابا وماما بيصحوني
أنا قلت بيني وبين نفسي
أكيد جايبين لي حاجة حلوة
وعايزين يوروهالي
رحت قمت من النوم بسرعة
وكنت هاموت أشوف هما بيصحوني من النوم ليه
وفجأة لقيت بابا بيحطلي دبوس على البيجامة
وماما بتقول خلاص حسونة بأة ضد الفساد
بصراحة مش عارف يعني إيه "ضد" ولا عارف يعني إيه "فساد"
بس قلت أهو كويس باين كده أنها حاجة حلوة
ورحت مكمل نوم عادي
وأنا بأقول: أنا ضد الفساد!
http://nadafa.org/

فيه إيه بس يا جماعة.. عايز أنام

أنا مبسوط والله.. ضد الفساد.. ضد الفساد

طيب خلاص أنا ضد الفساد يا جدعان

طيب بس فهموني يعني إيه "ضد" ويعني إيه "فساد"

أستعنا على الفساد بالله

Happy birthday Hassoona

أنا أتأخرت كتير في الكتابة
أصلي اليومين اللي فاتوا دي
كنت تعبان
كل شوية أكح وتجيلي إنفلونزا
وأفضل آخد في أدوية لغاية ما زهقت
المهم أنا عملت عيد ميلادي الأول
كان صغير خالص
وبصراحة اتفاجأت
في ناس أصحابي صغيرين جم
لينا- عمر- مريم- إبراهيم- محمود- لي لي- ولي لي التانية- باسنت- منة- فاطمة- يحيى
ومش فاكر مين تاني
وعملنا حفلة حلوة
وماما جابت تورتة مرسومة عليها صورتي
وكان هيصة
المهم إن كملت سنة
وأنا دلوقتي عندي سنة وشهرين
كل سنة وأنا طيب

التورتة وعليها صورتي

أنا مع سبايدر مان

أنا مع اللعب الكبيرة

ورحت للحلاق..

النهاردة وأنا قاعد في أمانة الله
لا بيا ولا عليا
فجأة.. لقيت بابا وماما بيلبسوني
وبياخدوني على برة
وأنا باسأل نفسي طول ما أحنا في العربية:
يا ترى هيودوني فين؟!
النادي؟!
السوبر ماركت؟!
محل لعب الأطفال؟!
هناكل برة؟!
مش عارف أي حاجة..
عند ناس أصحابنا؟!
ما هي دي الأماكن اللي بنروحها لما نخرج مع بعض..
المهم أنا سبت نفسي ليهم
وقولت أما أشوف هيودوني فين
وفجأة تاني.. لقيتهم دخلوني مكان غريب أول مرة أدخله
لقيت ناس كتير قاعدة على الكراسي
وناس كتير واقفة
وناس بتسرح شعر ناس
وناس ماسكة المقص وبيقصوا شعر ناس تانية
أنا مش فاهم أي حاجة يا جدعان
المهم.. قعدت مع بابا وماما مستني أشوف آخرة المكان ده أيه
وفجأة مرة تالتة – الظاهر ده يوم المفاجأت- لقيت ماما بتشيلني وبتقعدني على كرسي عالي
قدامه مراية كبيرة مش زي اللي عندنا في البيت
وبتفّهم الراجل وبتشاور على شعري
وبتقوله أقص له هنا وهنا
أنا سمعت الكلمة دي
وكان هيغمن عليا..
يعني أنا هاقص شعري دلوقتي؟!
يا نهار أبيض
هاموت من الخوف
أنا أعرف أن ماما لما بتستعمل المقص بتقص بيه ضوافري بس
طيب إزاي المقص اللي بيقص الضوافر هيقص الشعر
المهم.. أنا بصراحة مقدرتش أخبي رعبي
وفضلت أعيط.. أعيط.. أعيط..
ومسكت في ماما وبهدلت الدنيا
وكل الناس اللي فى المكان الغريب ده
قعدوا يبصوا عليا
وكل الناس بطلت تشتغل وفضلوا يبصوا عليا
والراجل اللي بيقص شعري ولا هامه عياطي
وعادي عمّال يقص في شعري
لغاية ما قصره خالص
بس بصراحة.. ماخبيش عليكم
شكلي بأة أحلى كتير بعد القص
وحسيت إني مستريح
وعرفت في الآخر خالص أن المكان ده أسمه "حلاق أو كوافير"
مش عارف بصراحة أي كلمة فيهم اللي صح
بس المهم إني حلقت

كنت لسة ماحلقتش وشعري هايش
هنا بأة حلقت وكله تمام
حاسس إن شكلي كدة أحلى
مبسوط بجد

إوعى القطر

دلوقتي بقى مش باحبي وبس
باحبي وبامشي كمان
وباتنطط وبالف وأنا ماشي
بس بصراحة باحب احبي أكتر
عشان مش باتعب
ومش باقع
لكن لما بامشي باقع كل شوية
ورجلي بتوجعني
بس أنا مبسوط خالص عشان بامشي
زي بابا وماما وتيتة..

إوعى القطر

لازم اسند على الحيطة عشان اريح رجلي شوية

واثق الخطوة يمشي ملكا


مشيت لغاية الكومبيوتر عشان ألعب في السلك

يا ترى أمشي أروح فين؟

في عيد ميلاد صاحبي

إمبارح كان عيد ميلاد صاحبي "سولي"
ماما أخدتني ورحنا في حديقة الأزهر
كانت الدنيا زحمة خالص
ولقيت في عيد الميلاد ناس كتير
ماكنتش أعرفهم
وكنت بصراحة عايز أنام
بس كان لازم أحضر عيد ميلاد سولي
هو كمل 3 سنين
وأديتله الهدية
وبعدين طفينا الشمع
بس أنا استغربت جدا
كان فيه عيال كتير أوي
وبياكلوا لوحدهم بالمعلقة
وبياكلوا تورتة عادي
حتى سولي كان بياكل تورتة
إشمعنا أنا مش باكل زيهم:(
وماما قعدت تأكلني جزر وزبادي
وأنا كان نفسي في التورتة:(
المهم إحنا مشينا بعد كدة
أنا بأة ماكنتش مستحمل خالص
لأني كنت هاموت عايز أنام
نمت في العربية ولغاية ما وصلنا البيت
وكملت نوم برضه

أنا قاعد وقالع الصندل وسولي بيستعد عشان يطفي الشمع

سولي ساب التورتة وبيلعب في العربية وأنا بابص له

أنا مع أصحابي محمود وحسن.. اسمه زي إسمي

أنا نايم في العربية بعد ما عيد الميلاد خلص

أنا باحب أنام كدة.. أنا حر

دى نومة حسونة

باحس انى مرتاح وأنا نايم بالمقلوب

كل ما أنام كدة ماما تعدلنى

بس أنا بارجع أنام كدة تانى .. أنا حر

حسونة عنده واوا

وأنا بالعب على السرير بتاعي وباضحك
وباتنطط عادي زي ما باعمل كل يوم
فجأة لقيت نفسي دايخ
واتخبطت فى سن السرير
ونزلت دم كتير أوي
ماما اخدتني على المستشفى
ولقيت جرح في قورتي
والدكتورة خيطت الجرح
وعملت حاجة اسمها غرزة
ماما كانت قلقانة لاحسن الغرزة دي تسيب أثر في وشي
بس الدكتورة طمنتها
وقالت لها مش هتسيب أثر
المهم أنى أنا دلوقتي تعبان جدا ودايخ
ومتضايق من الرباط اللي على راسي ده..
يا رب اخف بسرعة
والجرح ده ما يسيبش أثر:(

بعد ما خيطت الجرح

دلوقتى الواوا مش وجعاني

حتى بصوا..

رجعت من الأجازة وطلعت لي سنتين

رجعت أنا وبابا وماما من الأجازة
قعدنا في راس سدر كام يوم حلوين
مكناش بنعمل حاجة غير ننزل المية
وناكل ونشرب وننام
بس أنا تعبت شوية هناك
ماما قالت لبابا: حسونة بيسنن!
أنا مكنتش فاهم أي حاجة!
يعني أيه أنا باسنن؟!
لغاية ما فوجئت بحاجات طلعت في بقي
بابا قال إن دي اسمها سنان
وإني هاقدر آكل بيهم
أنا فرحت أوي بالموضوع ده
وحسيت إني كبرت لما طلعت لي سنتين
بس ماما بتقول إن فيه سنان تانية لسة هتطلع
أنا هاستنى واشوف بأة باقي السنان دي هتطلع امتى وفين؟

السنتين باينين أهم

وأنا في المية في سنان برضه

أنا باحبي وباتحرك من مكاني .. لالالالالالالا

النهاردة وبعد ما تعبت

من كتر تحريك رجلي عمال على بطال

من غير فايدة

وبعد ما زهقت من كتر ما باقع

وأنا باحاول اتحرك

علشان أجيب اللعبة بتاعتي

ووشي اتخرشم من كتر الخبطات

الحمدلله بقيت باحبي وباتحرك زي ما أنا عايز

وكمان باحاول أقف

بس رجلي بتتعبني من الوقفة

ياللا كلها أيام وامشي انشاء الله زي ماما وبابا

ووسع وسع .. حسونة بيحبي

شوفتوني .. أنا مبسوط
بصوا الحركة دي

ودي .. كمان

باحب الزبادي

زمااااان لما كنت صغير خالص ونونو

كنت باحب أرضع

وكل شوية أرضع لبن وبس

لكن دلوقتي حياتي اختلفت

أنا بقيت باكل

باكل بطاطس مسلوقة

وتفاح مسلوق وجزر وكوسة وموز وسيريلاك

بس أكتر حاجة باحب أكلها الزبادي ..

طعمه جميل خالص

أنا صحيح باوسخ نفسي

وباوسخ هدومي وباوسخ كل حاجة وأنا باكله

بس باحبه أوي

هاتي يا ماما معلقة زبادي

خلاص مش هاوسخ نفسي تاني بس أكليني

حسونة كان تعبان

يا ربي أيه المغص اللي في بطني ده ؟
مش حاسس بأي حاجة حواليا
ماما لما لقتني تعبان كدة وباسهل ومش بالعب زي الأول
قلقت عليا أوي
وودتني للدكتور
الدكتور كشف عليا بالسماعة
وقال لماما
حسونة عنده فيروس
ماما اتخضت وقالت له : الفيروس جاله من فين؟
قالها ده فيروس بييجي من الهوا وبيعمل إسهال وبياخد أسبوع
أنا سمعت كلمة أسبوع دي وكان هيغمن عليا
ده أنا مش مستحمل في يومين
هاعمل أيه في أسبوع
المهم الحمدلله الفيروس مشي وأنا بقيت كويس
بس خسيت 200 جرام
لأني ماكنتش باكل كويس
وكنت باسهل طول الوقت
التعب ده حاجة وحشة خالص
أنا كنت زهقان أوي
يا رب ما اتعبش تاني

دي صورتي بعد ما خفيت بس عنيا دخلت جوة

ولبست جزمة

هييييييه ولبست جزمة ..

إمبارح لبست جزمة
أول جزمة في حياتي
كنت دايما باشوف الناس كلها لما بتخرج بتلبس حاجة في رجلها
أنا الوحيد اللي كنت باخرج وأنا حافي
مارضيتش اسأل ماما واقولها اشمعني أنا
وقلت أصبر شوية أكيد هي هتلبسهاني من نفسها
لغاية ما في يوم
فوجئت بماما بتلبسني الجزمة الكحلي بتاعتي
اللي كانت شيلاها من قبل ما أتولد
المهم لبست الجزمة
وكنت مبسوط أوي
بس حاسس أن رجلي مقفولة بحاجة
ومش واخد راحتي خالص
لكن الحق يتقال إحساس حلو أوي أن الواحد يلبس جزمة زي كل الناس
وقلت في نفسي كويس اني صبرت واني ماسألتش ماما
لأنها لبستها لي من غير ما أقولها
فعلا الصبر طيب

هيييييييييييه ولبست جزمة

جزمتي الكحلي أهي

نايم بالجزمة على السرير .. عادي ما هو أنا مش بامشي أصلا

عملت اللي في دماغي

أنا عملت اللي في دماغي ..
قعدت في يوم أعيط وأصوت وأصرخ وأرفس برجلي
لغاية لما ماما زهقت مني واخدتني على البيسين ..
الأول كانت بتهديني بس ، وراحت اشترت لي مايوه كحلي
بس أنا مسبتهاش إلا لما لبستهولي في البيت
وكنت مصمم أفضل لابسه في البيت
يمكن تحن عليا وتوديني البيسين وتحس بالحر اللي أنا حاسس بيه
ولما حست اني مصمم ما أقلعش المايوه خدتني على البيسين
أنا مش هاكدب عليكم أول ما شفت البيسين
لقيته كبير أوي وواسع
وقلت أنا هاعمل أيه في المية دي كلها
ده أنا مش باستحمل أشوف مية البانيو وباحس أنه واسع عليا
المهم استعنت بالله وركزت وقلت يعني أيه اللي هيحصل أنا أنزل المية
واللي يحصل يحصل
ماما دهنت جسمي بالكريم الأول
ونزلت البيسين والحقيقة أول ما لمست المية
حسيت إني هاموت من الخوف
وكنت خايف ماما تسيبني
هي سابتني فعلا بس الحمدلله العوامة أنقذتني
أصلها نزلتني المية وهي كانت برة
المهم بعد كدة حسيت أن المية جميلة أوي وماكنتش عايز أخرج
بس ماما خرجتني علشان خافت عليا من البرد
وقعدت في الشمس بأة ونمت كتير أوي
يا جماعة أنا هأقولكم بالصور الخطوات اللي لازم كل بيبي زيي
يعملها علشان ينفذ اللي في دماغه ويخلي مامته توديه البيسين

أولا : البس المايوه في البيت

ثانيا : اقلع هدومك أول ما توصل البسين


ثالثا : كشر لغاية ما مامتك تلبسك المايوه

رابعا : أعمل كأن البامبرز مضايقك عشان تقلعه

خامسا : حس انك انتصرت لأن ماما بتطلع المايوه

سادسا: استنى بفرحة لغاية ما تلبسه

سابعا : انزل البيسين بالعوامة


ثامنا : خاف على نفسك لما يسبوك من غير عوامة

تاسعا : فكر هتعمل أيه لو سابوك من غير العوامة .. العمر مش بعزأة

عاشرا : اتشمس ونشف نفسك ونام

لازم أصيف

كل شوية أسمع بابا وماما بيقولوا عايزين نصيف ..
مش فاهم يعني أيه نصيف دي
بس وانا مركز معاهم – وهما مش واخدين بالهم – باسمعهم بيقولوا :
الجو بقى حر ، عايزين نخفف لحسن
لأ لاحسن يجيله برد نستنى شوية
وأنا مش فاهم أي حاجة
لغاية ما بابا صورني صورة وأنا نايم
وكنت بأشر مية ( ماما قالت أن ده اسمه عرق )
اتفجأت بموضوع العرق ده ومعرفتش ازاي وشي يطلع مية كدة
اللي أعرفه إني باشوف المية لما باعمل بي بي بس
إزاي وشي يطلع مية كدة
مش فاهم يا ناس
المهم إني لما شفت المية في وشي وأنا نايم عرفت إني لازم أصيف

العرق بيشر من وشي يا ناس

أرحميني يا ماما .. شيلي البطانية

كلام كبير .. كبيييييييييييييييير

أنا عندي مفاجأة جامدة مووووووت

أول مرة في حياتي أترسم

رسامين الكاريكاتير أصحاب بابا وماما رسموني

وخلوني في الرسومات أقول كلام كبير أوي

حد يصدق إني أنا أتكلم في السياسة !!

أنا مبسوط منهم أوي لأنهم خلوني شجاع

وقلت حاجات مهمة أنا صحيح مش فاهم منها ولا حاجة

بس أنا فرحان بنفسي أوي لما أكبر – إنشاء الله – هأقول أكتر من كدة

أنا باشكر كل اللي رسموني

دعاء العدل وهشام رحمة ومخلوف وقنديل وهاني شمس وعبدالله

ويا ريت يرسموني على طول لغاية ما أكبر

يا أبو ضحكة جنان

عايز أبقى زي سعد الصغير

وسع وسع .. حسونة بيتكلم في السياسة

يا واد يا تقيل

يا ابو كف رقيق وصغير

عايز حقي .. رضعة كبيرة

أبجد هوز

حسونة عنده ضيوف

كل يوم ييجي عندنا ناس وضيوف
بس المرة دي غير كل مرة ..
صاحبة ماما جت ومعاها بنتها
عرفت وأنا باسمعهم أن اسمها لي لي
بس هي كبيرة خالص ..
ده أنا فوجئت أنها بتمشي
لي لي كانت عاملة دوشة جامدة أوي
وعيطت كذا مرة
مع أن أنا اللي لسة نونو خالص وما كنتش باعيط
بس بصراحة هي أمورة أوي
وأنا حبيتها
أعتقد إني لما أكبر شوية أنا ولي لي هنبقى أصحاب
بس هي لازم تهدى شوية
لأنها شقية أوي

أنا ولي لي

لي لي عايزة تبوسني

أنا مكسوف

أنا مكسوف أوي .. بس كمان فرحان أوي أوي ..
أصل النهاردة حصلت لي حاجة غريبة جدا ..
كنت قاعد مع نفسي كدة
وفجأة لقيتني باعمل حركات غريبة بوشي
ولقيت بقي بيتفتح أوي
ماما بصت عليا ولقتني في الحالة دي
وندهت بابا وكانت فرحانة أوي هي وبابا..
وانا مش فاهم هما فرحانين كدة ليه
بس بعد كدة عرفت أنهم فرحانين علشان دي أول مرة أضحك ..
وعرفت أن الحركات اللي كنت باعملها بوشي اسمها ضحك
يعني أنا دلوقتي وعمري لسة مابقاش 3 شهور بقيت باعرف أضحك
على فكرة الضحك ده حاجة جميلة أوي أحسن كتير من العياط
عموما دلوقتي أنا فهمت حاجة جديدة :
لما أكون متضايق أعيط
ولما أكون فرحان أضحك وأكركر
الحمد لله إني اتعلمت الضحك
دي بقى أول صور ليا وأنا بضحك وأكركر

الضحك قال يا سم ع التكشير

اضحك كركر أوعى تفكر

اضحك الصورة تطلع .. شربات

حسن بيقول يا رب

يا رب يا كريم

يا رب أرضع لغاية ما أشبع
يا رب لما أرضع ما ارجعش
يا رب ما يجينيش إسهال
ولا إمساك
يا رب ماما تسمعني أول ما أعيط
يا رب ماما تحس إني عملت بي بي بسرعة
علشان البامبرز بيضايقني
يا رب البامبرز ما يضغطش على بطني
يا رب ما استحماش كل يوم علشان الدنيا برد
يا رب ماما ما تلبسنيش بافتة علشان بتخنقني

(ابتهالات خاصة )

أنا واللمبة

مش عارف ليه باحب أبص في اللمبة وأركز جامد

لما بابص عليها بانسى الدنيا وما فيها

فيها حاجة بتشدني

ويا سلام بقى لما الدنيا تكون ضلمة وفجأة ماما أو بابا يفتحوا النور

ساعتها باحس بأمان وباحس أني محتاج أركز في اللمبة حبيبتي

أنا باحب اللمبة جدا وعشان كدة قررت أني أطلع وأبص عليها من قريب

وأشوف بتشتغل ازاي

وكمان علشان أحس أني قريب منها

أبو علي واللمبات الثلاثة

أنا وحبيبتي

حزين حزين حزين

الحقيقة أنا حزين حزين حزين ..

امبارح فتحت الإيميل بتاعي لقيت رسايل كتير

للأسف كل الناس بيقولوا اني مش أنا اللي باكتب في المدونة بتاعتي

وناس كتير بيقولوا أن ماما أو بابا هما اللي بكتبوا لي

ومفيش حد مصدق اني أنا فعلا اللي باكتب في المدونة

وعموما أنا جبت الصورة اللي هتكذب كل الحاجات اللي بتتقال عني

ومش هتخللي أي حد يشك إني أنا اللي باكتب في المدونة دي

بافتح الإيميل

بامارس هوايتي في التدوين

bed alone

أنا الحمد لله شبعان ..
ومش مبلول لأن لسة ماما مغيرة لي البامبرز ..
وحاسس بالدفا ومتكلفت في 3 بطاطين ..
ومش عندي مغص ولا فيه حاجة بتتعبني ..
طيب المشكلة فين بأة .. ؟!
انا ليه باعيط كدة ومش عايز أسكت ؟
فضلت أفكر في موضوع العياط ده كتير
لغاية ما اكتشفت السبب
أنا باعيط لما أحس اني لوحدي
أصل إحساس الوحدة ده بشع
وبيخوفني ..
أنا باحس بالوحدة لما ماما تكون في المطبخ
أو لما يكون معاها حد وسايباني لوحدي
أو لما تكون بتشتغل على الكومبيوتر
أنا باحاول اني ما أعيطش علشان ما أضايقش ماما
بس للأسف احساسي بالوحدة بيسيطر عليا
وبيخليني أعيط غصب عني
يا ريت ماما ما تزعلش مني
ويا ريت ما تسبنيش لوحدي على السرير

lonely

أنا أبو علي الحقيقي مش كريم عبد العزيز

النهاردة وانا مأنتخ في سريري بعد الرضعة

وبافكر في حكاية الاستحمام وفي الرضعة الجاية

فوجئت بماما بتعلي التليفزيون وبتقولي بصوت عالي : يا حسونة فيلم أبو علي جه

أنا طبعا – بيني وبين نفسي – قلت فيلمي ؟!هو أنا عملت فيلم باسمي وانا مش عارف ؟!

وسألت نفسي بعد كدة : هو يعني أيه فيلم أصلا ؟!

المهم لقيت ماما منسجمة مع الفيلم ومركزة معاه جامد

فقعدت أنا أتفرج يمكن اتسلى شوية

ولقيتها فرصة علشان أشغل دماغي بحاجة تانية غير التفكير في الرضعةاللي هتاكل دماغي

والحقيقة اني لقيت الفيلم حلو أوي وممتع جدا

ومن شدة اعجابي بالفيلم تخيلت اني باشارك فيه

وتخيلت نفسي أبو علي اللي في الفيلم

وان الفيلم معمول أصلا عشاني

والصورة دي ظهرت لي في الحلم اللي حلمته بعد ما تخيلت نفسي أبو علي

أنا في النص أهو

قبل وبعد

دي صوري قبل الاستحمام وبعده

وطبعا باين الفرق في الأولى أنا مصدوم ومش فاهم أيه اللي هيجرى لي

وفي التانية مأنتخ ونايم في السرير

الصدمة

الأنتخة

الخونة

خيااااااانة .. احساس فظيع فظيع فظيع
الخيانة دي حاجة وحشة جدا ..
خصوصا لما تيجي من أقرب الناس لقلبي ..
ماما أخدتني النهاردة على خوانة ..
من الدار للنار
كنت نايم وحاسس بالدفا وباحلم بالرضعة الجاية
وحاسس بطعم اللبن الجميل في بقي
وصحيت على أمل أن ماما هترضعني ومستني على نار ..
وفجأة حصل اللي عمري ما كنت أتخيل أنه يحصل
ماما قلعتني هدومي كلها كنت هاموت من البرد
وشالتني وحطتني في المية ..
في الأول صرخت من الصدمة
لكن الحق يتقال بعد كدة لقيت نفسي مبسوط المية كانت حلوة أوي ..
لكن أكتر حاجة ضايقتني في الموضوع ده
لما الشامبو كان بييجي على عيني ..
بس تمام ..
بعد الموضوع ده ولما ماما لبستني
حسيت بانتعاش جامد وعرفت ان الحكاية دي اسمها استحمام
ماما رضعتني بعد كدة رضعة تمام
بس ده ما يمنعش اني حسيت بالغدر في الأول
الحقيقة كان لازم ماما تقولي قبلها مش تصدمني كدة

أوعي تسيبيني يا تيتة .. أنتوا هتغرقوني ولا أيه ؟

سيبي سيبي .. أنا هاعوم لوحدي

أنا مين ؟!!

بصراحة أنا اتلخبطت آخر لخبطة .. وعايز أعرف أنا مين بالظبط ؟
ماما بتناديني وبتقولي حسونة
وبابا بيقولي يا أبو علي
وفي ناس بييجوا عندنا البيت بيقولوا ان اسمي حسن
أنا مين في دول .. حسونة ولا أبو علي ولا حسن
حد يفهمني لاحسن دماغي هتضرررررب

يا ترى أنا مين فيهم؟!

يوم ورا يوم ..

النهاردة ماما قررت أنها تعمل لي مدونة على النت لاني كملت 40 يوم بالظبط
أصل أنا اتولدت يوم 24 ديسمبر 2006
ماما فضلت تعمل في المدونة دي أكتر من 5 ساعات وفي الآخر عملتها والحمدلله
بس اللي كان مضايقني أنها كانت مشغولة عني جدا ومش مركزة معايا خالص
أنا بصراحة استغربت من انشغالها ده وسألت نفسي هو مين اللي إبنها أنا ولا الكومبيوتر ؟
عموما أنا في الآخر لما عرفت أنها بتعمل كل ده علشاني انبسطت وكبرت دماغي وما زعلتش منها
المهم إني بعد كل ده في المدونة دي هاقدر اكتب يومياتي يوم ورا يوم
أنا دلوقتي مرتاح جدا لاني لو اتضايقت أو زعلت من بابا أو ماما هاقدر أدخل على النت
وأفضفض بدل ما أكتم في نفسي وأطق من الغيظ والوأوأة

online حسونة